Skessuhorn:

Skagamenn lögðu Keflvíkinga í æfingaleik

9. febrúar 2010

Akurnesingar halda áfram sigurgöngu sinni í æfingaleikjum á undirbúningstímabilinu í fótboltanum. Á laugardaginn gerðu þeir sér lítið fyrir og lögðu efstudeildarlið Keflvíkinga 3:0 í leik sem fram fór í Reykjaneshöllinni.  Þrátt fyrir að hafa séð um heilt herrakvöld og unnið langt fram á nótt, mættu Skagastrákar gríðarlega ákveðnir til leiks og ætluðu greinilega að halda uppteknum hætti úr æfingaleikjum í nýliðnum janúarmánuði. ÍA-menn skorðu öll þrjú mörkin í fyrri hálfleiknum og voru þar á ferðinni Heimir Einarsson, Andri Júlíusson og Ragnar Leósson. Í síðari hálfleik voru Skagamenn nær því að bæta við mörkum en Keflvíkingar að minnka muninn, samkvæmt því sem fram kemur á heimasíðu KFÍA.